നാല് വർഷത്തിനിടെ നല്‍കിയത് 20.62 കോടിയുടെ ഉന്നതവിദ്യാഭ്യാസ സ്‌കോളർഷിപ്പ്
ഉന്നതവിദ്യാഭ്യാസ മേഖലയിൽ ശ്രദ്ധേയമായ മുന്നേറ്റങ്ങളും പിന്തുണയുമായി പഠന, ഗവേഷണ മേഖലകളിൽ സർക്കാർ ഉറപ്പാക്കുന്നത്. വിദ്യാർത്ഥികൾക്ക് ഉന്നത വിദ്യാഭ്യാസം നേടാനുള്ള പിന്തുണയും, ഗവേഷണ മികവിനുള്ള പ്രോത്സാഹനവ…
ഉന്നതവിദ്യാഭ്യാസ മേഖലയിൽ ശ്രദ്ധേയമായ മുന്നേറ്റങ്ങളും പിന്തുണയുമായി പഠന, ഗവേഷണ മേഖലകളിൽ സർക്കാർ ഉറപ്പാക്കുന്നത്. വിദ്യാർത്ഥികൾക്ക് ഉന്നത വിദ്യാഭ്യാസം നേടാനുള്ള പിന്തുണയും, ഗവേഷണ മികവിനുള്ള പ്രോത്സാഹനവും ഉറപ്പാക്കുന്ന നിരവധി പദ്ധതികളാണ് നിലവിൽ വന്നിട്ടുള്ളത്. സർവകലാശാലകളോട് അഫിലിയേറ്റ് ചെയ്ത സർക്കാർ/എയ്ഡഡ് ആർട്‌സ് & സയൻസ് കോളേജുകളിലും ഐ.എച്ച്.ആർ.ഡി. അപ്ലൈഡ് സയൻസ് കോളേജുകളിലും ശാസ്ത്രം, സാമൂഹിക ശാസ്ത്രം, മാനവിക വിഷയങ്ങൾ, ബിസിനസ് സ്റ്റഡീസ് എന്നീ ബിരുദ പഠനത്തിനും ബിരുദാനന്തര ബിരുദതലത്തിൽ തുടർപഠനത്തിനുമായി അഞ്ചുവർഷത്തേക്കുള്ള ‘ഉന്നതവിദ്യാഭ്യാസ സ്‌കോളർഷിപ്പ് പദ്ധതി’ ആരംഭിച്ചു. 2021 മുതലുള്ള നാല് വർഷത്തിനിടെ ഈ പദ്ധതിയിലൂടെ 20.62 കോടി രൂപയാണ് സ്‌കോളർഷിപ്പായി വിതരണം ചെയ്തത്. ആയിരക്കണക്കിന് വിദ്യാർത്ഥികൾക്ക് ഉന്നത വിദ്യാഭ്യാസം പ്രാപ്യമാക്കാൻ ഇത് സഹായിച്ചു.
ഗവേഷണ മേഖലയിലെ മികവിനെ അംഗീകരിക്കാനും പ്രോത്സാഹിപ്പിക്കാനുമായി ‘കൈരളി റിസർച്ച് അവാർഡുകൾ’ ആരംഭിച്ചു. നവകേരള സൃഷ്ടിക്ക് അനുയോജ്യമായ ഗവേഷണങ്ങൾക്ക് പ്രോത്സാഹനം നൽകാൻ പത്ത് ബൃഹദ് വിജ്ഞാന മേഖലകളിൽ ‘ചീഫ് മിനിസ്റ്റേഴ്‌സ് നവകേരള പോസ്റ്റ് ഡോക്ടറൽ ഫെലോഷിപ്പ്’ നൽകിവരുന്നു. ആദ്യഘട്ടത്തിൽ 77 ഫെലോഷിപ്പുകൾ പ്രഖ്യാപിച്ചു. രണ്ടാംഘട്ടത്തിൽ 68 ഫെലോഷിപ്പുകൾ പ്രഖ്യാപിച്ചു. സർവകലാശാലകളിലെ ട്രാൻസ്ലേഷണൽ റിസർച്ച് സെന്ററുകൾക്ക് 31 ഫെലോഷിപ്പുകൾ (മോഡ് ഒന്ന് പ്രകാരം) പ്രഖ്യാപിച്ചു. ഈ പദ്ധതിക്കായി കഴിഞ്ഞ നാല് വർഷത്തിനകം 7.38 കോടി രൂപ നൽകിയിട്ടുണ്ട്.
ഇത് ഗവേഷണ മേഖലയിൽ കൂടുതൽ സാധ്യതകൾ തുറന്നുനൽകുകയും, കേരളത്തിന്റെ വികസനത്തിന് ആവശ്യമായ ഗവേഷണങ്ങളെ പ്രോത്സാഹിപ്പിക്കുകയും ചെയ്യുന്നു. ഈ നേട്ടങ്ങൾ, കേരളം ഉന്നതവിദ്യാഭ്യാസത്തിലും ഗവേഷണ രംഗത്തും ഒരു പ്രധാന ശക്തിയായി മാറുന്നു എന്നതിന്റെ സൂചനയാണ്.
വിദ്യാർത്ഥികൾക്കും ഗവേഷകർക്കും സമഗ്ര പിന്തുണയോടെ മുന്നോട്ട് പോവുകയാണ് നവകേരളം!
കരുത്തോടെ കേരളം- 51
