പെരിയാറ്റിൽ കുളിക്കാനിറങ്ങിയ വിദ്യാർഥി ഒഴുക്കിൽപ്പെട്ടു മരിച്ചു

പെരിയാറ്റിൽ കുളിക്കാനിറങ്ങിയ ഏഴാം ക്ലാസ് വിദ്യാർഥി ഒഴുക്കിൽപ്പെട്ട് മരിച്ചു. മേക്കാലടി മങ്ങാടൻ വീട്ടിൽ ഷിനാസിൻ്റെയും സുറുമിയുടെയും മകൻ ദുൽഖിഫിൻ (11)ആണ് മരിച്ചത്. തിങ്കൾ വൈകീട്ട് ആറോടെ മേക്കാലടി ലക്ഷം വീട് കടവിലാണ് അപകടം. സുറുമിയോടൊപ്പം കുളിക്കാൻ പോയ മൂന്ന് മക്കളും സഹോദരന്റെ കുട്ടിയുമാണ് ഒഴിക്കിൽപ്പെട്ടത്. നാട്ടുകാർ ചേർന്ന് മൂന്ന് കുട്ടികളെ രക്ഷിച്ചു. എന്നാൽ ഒഴുക്കിൽപ്പെട്ട ദുൽഖിഫിനെ രക്ഷപ്പെടുത്താൻ സാധിച്ചില്ല.

അങ്കമാലിയിൽ നിന്നും എത്തിയ അഗ്നിശമന സേനാനികളും കാലടി പൊലീസും ചേർന്ന് തിരച്ചിലി നൊടുവിൽ വൈകീട്ട് 7.15 ഓടെ മൃതദേഹം പുഴയിൽ നിന്നും കണ്ടെടുത്തത്. മൃതദേഹം അങ്കമാലി താലൂക്ക് ആശുപത്രിയിലേക്ക് മാറ്റി. കണ്ണൂരിൽ താമസക്കാരായി കുടുംബം സ്കൂൾ അവധി പ്രമാണിച്ച് തറവാട് വീടായ മേക്കാലടിക്ക് വന്നപ്പോഴാണ് അപകടം. ചൊവ്വാഴ്ച കണ്ണൂരിലേക്ക് തിരികെ പോകാനിരുന്നതുമാണ്. ഖബറടക്കം ചൊവ്വ ഉച്ചക്ക് ശേഷം മേക്കാലടി ജുമാ മസ്ജിദ് ഖബർസ്ഥാനിൽ നടക്കും. സഹോദരങ്ങൾ: ദിയാൽ അൽദിൻ, ദിൽഹാൻ സലാം, മുഹമ്മദ് ദയാൻ.