അനുഭവങ്ങളാണ് നിലപാടുകളിലേക്ക് നയിക്കുക : രഞ്ജു രഞ്ചിമാർ

അനുഭവങ്ങളിൽ നിന്നുമാണ് നിലപാടുകൾ ഉണ്ടാകുകയെന്നും സത്യം വെളിപ്പെടുത്തുകയാണ് പ്രധാനമെന്നും പ്രശസ്ത മേക്കപ്പ് ആർട്ടിസ്റ്റും എഴുത്തുകാരിയും ആക്റ്റിവിസ്റ്റുമായ രഞ്ജു രഞ്ചിമാർ. കെഎൽഐബിഎഫ് ഡയലോഗ് സെഷനിൽ സംസാരിക്കുകയായിരുന്നു അവർ.

ചെറുനോവലുകളിൽ തുടങ്ങിയ വായന പിന്നീട് ഗാന്ധിജിയിലേക്കും അംബേദ്കറിലേക്കുമെത്തി. പുസ്തക വില്പനയും ചെയ്തിട്ടുണ്ട്. പുസ്തക വിൽപ്പനയിൽ നിന്ന് ലഭിച്ച കാശ് കൂട്ടിവെച്ച് ആദ്യമായി അമ്മയ്ക്ക് കമ്മൽ വാങ്ങി നൽകി. ജീവിതത്തിൽ ഏറ്റവും സന്തോഷകരമായ നിമിഷമായിരുന്നു അത്.

സുഹൃത്തുക്കളുടെ ഉന്നമനത്തിനായാണ് ദ്വയ എന്ന സംഘടന തുടങ്ങിയത്. ഇപ്പോൾ ദ്വയയുടെ നേതൃത്വത്തിൽ ഇന്ത്യയിലുടനീളം പരിപാടികൾ നടത്തുന്നുണ്ട്. കുട്ടിക്കൂറ എന്ന ഷോർട്ട് ഫിലിം സംവിധാനം ചെയ്തു. ആത്മകഥയും കുട്ടിക്കൂറ എന്ന പേരിലാണ്. ശരീരം എങ്ങനെ കാത്തുസൂക്ഷിക്കണമെന്നതും എങ്ങനെ ഒരുങ്ങണമെന്നതും ഓരോരുത്തരുടെയും സ്വാതന്ത്ര്യമാണെന്നും അവർ പറഞ്ഞു.