സംസ്കൃത നാടകത്തിൽ മികവുമായി ഇടുക്കി സ്കൂൾ

സാമ്പത്തിക പരിമിതികളെ അധ്യാപികയുടെ നിസ്വാർഥമായ സേവനത്തിൽ മറികടന്ന് സംസ്കൃതോത്സവത്തിൽ മികച്ച പ്രകടനവുമായി ഇടുക്കി ജില്ലയിലെ നങ്കിസിറ്റി എസ് എൻ എച്ച് സ്കൂൾ. സംസ്ഥാന സ്കൂൾ കലോത്സവത്തിലെ സംസ്‌കൃത കലോത്സവത്തിൽ നങ്കിസിറ്റി എസ് എൻ എച്ച് സ്കൂൾ അഞ്ചിനങ്ങളിലാണ് പങ്കെടുത്തത്. ഗാനാലാപനം, പാഠകം, സമസ്യാപൂരണം, പ്രശ്നോത്തരി, സംസ്‌കൃത നാടകം എന്നിവയാണ് പങ്കെടുത്ത മത്സരങ്ങൾ.

അഭിരുചി പ്രകടമാക്കാനൊരു വേദി ലഭിച്ചതിന്റെ സന്തോഷത്തിലാണ് നങ്കിസിറ്റിയിലെ സംസ്‌കൃത അധ്യാപിക ഡോ വി എസ് പ്രവിത. നങ്കിസിറ്റിയിലെ കുട്ടികൾ പ്രവിത ടീച്ചറുടെ സൗജന്യ ശിക്ഷണത്തിലാണ് സംസ്‌കൃതോത്സവത്തിലെ പരിപാടികളിൽ പങ്കെടുക്കാൻ പരിശീലനം നേടിയത്. സാമ്പത്തികമായി പിന്നോക്കം നിൽക്കുന്ന കുട്ടികൾക്ക് അവസരം നഷ്ടമാകരുതെന്ന ഉദ്ദേശത്തിലാണ് പ്രതിഫലമില്ലാതെ പരിശീലനം നൽകാമെന്ന തീരുമാനത്തിൽ പ്രവിത ടീച്ചർ എത്തുന്നത്.

‘കാലചക്രം’ എന്ന സംസ്‌കൃത നാടകമാണ് ഇത്തവണ എ ഗ്രേഡ് നേടിയത്. ജെറിൻ ബൈജു, കീർത്തന കലേഷ്, ഹന്ന ജോർജ് എന്നിവരാണ് നാടകത്തിൽ പ്രധാന കഥാപാത്രങ്ങളെ അവതരിപ്പിച്ചത്. വരും വർഷങ്ങളിൽ കൂടുതൽ മത്സരങ്ങളിൽ പങ്കെടുക്കാനുള്ള തയ്യാറെടുപ്പിലാണ് ടീച്ചറും കുട്ടികളും.