വാരാണസിയിൽ മോദിയുടെ ഭൂരിപക്ഷം 3 ലക്ഷത്തോളം കുറഞ്ഞു

മോദി ഗ്യാരന്റി വാരാണസിയിലെ വോട്ടർമാരും തള്ളി. സ്വന്തം മണ്ഡലത്തിൽ ഭൂരിപക്ഷം ദയനീയമായി കുറഞ്ഞു. 1,52,513 വോട്ടിന്റെ ഭൂരിപക്ഷമാണ് ലഭിച്ചത്. 2019-ലെ ഭൂരിപക്ഷത്തില്‍നിന്ന് മൂന്നു ലക്ഷത്തിലേറെ വോട്ടുകളാണ് കുറഞ്ഞത്. .

2019-ലെ തിരഞ്ഞെടുപ്പില്‍ നാല് ലക്ഷത്തിലേറെ വോട്ടുകളുടെ ഭൂരിപക്ഷം നൽകിയ മണ്ഡലം തുടക്കത്തിൽ പിന്നിലാക്കി ഞെട്ടിക്കുകയും ചെയ്തു.  വോട്ടെണ്ണലിന്റെ ആദ്യമണിക്കൂറില്‍ വാരാണസിയില്‍ മോദി പിന്നിലായിരുന്നു. കോണ്‍ഗ്രസ് സ്ഥാനാര്‍ഥി അജയ് റായിയുടെ കുതിപ്പിനാണ് ആദ്യമണിക്കൂറില്‍ വാരാണസി സാക്ഷ്യംവഹിച്ചത്. ആദ്യഘട്ടത്തില്‍ പതിനായിരത്തിലേറെ വോട്ടുകള്‍ക്ക് ലീഡ് അജയ് റായി സ്വന്തമാക്കി.

പിന്നാലെ നരേന്ദ്രമോദി ലീഡ് പിടിച്ചെടുക്കുകയായിരുന്നു. ആകെ 6,12,970 വോട്ടുകളാണ് നരേന്ദ്രമോദിക്ക് ലഭിച്ചത്. കോണ്‍ഗ്രസ് സ്ഥാനാര്‍ഥി അജയ് റായിക്ക് 4,60,457 വോട്ടും. 2019-ല്‍ 4,79,505 വോട്ടിന്റെ ഭൂരിപക്ഷത്തിലായിരുന്നു മോദിയുടെ ജയം.

മൂന്നു തവണ തുടർച്ചയായി മണ്ഡലത്തെ പ്രതിനിധീകരിക്കയും പ്രധാനമന്ത്രി പദത്തിലേറുകയും ചെയ്ത നേതാവിന് 54.24 ശതമാനം പേരുടെ സമ്മതി മാത്രമാണ് ലഭിച്ചത്. എതിർ സ്ഥാനാർത്ഥിക്ക് 40.74 ശതമാനം വോട്ട് വിഹിതം ലഭിച്ചു.

കഴിഞ്ഞ വർഷം മോദി 63.62 ശതമാനം വോട്ട് നേടിയിരുന്നതാണ്. 2014 ൽ 56.37 ശതമാനം പേരുടെ സമ്മതിയും നേടിയിരുന്നു.