ക്രമക്കേട് കണ്ടെത്തി; യുജിസി നെറ്റ് പരീക്ഷ റദ്ദാക്കി: അന്വേഷണം സിബിഐയ്ക്ക്

ക്രമക്കേട് നടന്നതായി കണ്ടെത്തിയതിനെ തുടർന്ന് ചൊവ്വാഴ്ച നാഷണൽ ടെസ്റ്റിങ് ഏജൻസി നടത്തിയ യുജിസി നെറ്റ് പരീക്ഷ റദ്ദാക്കി. പരീക്ഷയിൽ ക്രമക്കേട് കണ്ടെത്തിയതിനെത്തുടർന്ന് റദ്ദാക്കുന്നുവെന്നാണ് കേന്ദ്ര വിദ്യാഭ്യാസ മന്ത്രാലയം അറിയിച്ചത്. രണ്ടു ഷിഫ്റ്റുകളിലായി രാജ്യത്തെ വിവിധ നഗരങ്ങളിലാണ് ഇന്നലെ പരീക്ഷ നടന്നത്. സൈബർ ക്രൈം കോഓർഡിനേഷൻ സെൻറർ ക്രമക്കേട് നടന്നതായി കണ്ടെത്തിയതിൻറെ അടിസ്ഥാനത്തിലാണ് പരീക്ഷ റദ്ദാക്കാൻ എൻടിഎ തീരുമാനിച്ചത്.

വീണ്ടും പരീക്ഷ നടത്താൻ തീരുമാനമായി. പരീക്ഷയിൽ ക്രമക്കേട് നടന്നത് അന്വേഷിക്കാൻ സിബിഐയെ ചുമതലപ്പെടുത്താനും തീരുമാനമായിട്ടുണ്ട്. പുതിയ പരീക്ഷ തീയതി പിന്നീട് പ്രഖ്യാപിക്കും. ബുധനാഴ്ചയാണ് സൈബർ സുരക്ഷ അതോറിറ്റി പരീക്ഷയിൽ ക്രമക്കേട് നടന്നെന്ന വിവരം യുജിസിയെ അറിയിക്കുന്നത്.  

83 വിഷയങ്ങളിലേക്കുള്ള പരീക്ഷയാണ് ഇന്നലെ ഒറ്റദിവസം രണ്ട് ഷിഫ്റ്റുകളിലായി നടന്നത്. 11 ലക്ഷം പേരാണ് പരീക്ഷയെഴുതിയത്.