കേരളം ബജറ്റ് 2024; ഗതാഗതമേഖലയ്ക്ക് 1976 കോടി; 1000 കോടിയുടെ റോഡ് നിർമാണ പ്രവർത്തനം

ഗതാഗത മേഖലയിൽ നടപ്പാക്കിയത് സമഗ്രമായ പരിഷ്കാരങ്ങളാണെന്ന് ധനമന്ത്രി കെ എൻ ബാല​ഗോപാൽ. ​ഗതാ​ഗത മേഖലയുടെ സമ​ഗ്രവികസനത്തിനായി 1976 കോടി രൂപ അനുവദിച്ചതായി മന്ത്രി പറഞ്ഞു. ഗ്രാമീണ റോഡുകളുടെ വികസനം ത്വരിത​ഗതിയിലാക്കും. 1000 കോടി രൂപയുടെ റോഡ് നിർമാണ പ്രവർത്തനങ്ങൾ നടത്തുമെന്നും മന്ത്രി വ്യക്തമാക്കി.

കെഎസ്‌ആർടിസിക്ക് 128.54 കോടി രൂപ അനുവദിച്ചതായും മന്ത്രി വ്യക്തമാക്കി. ഇതിൽ 92 കോടി പുതിയ ബസുകൾ വാങ്ങാനായാണ് അനുവദിച്ചത്. മൂന്നുവർഷത്തിനിടെ കെഎസ്ആർടിസിക്ക് 4917.92 കോടി അനുവദിച്ചതായും മന്ത്രി വ്യക്തമാക്കി.

തുറമുഖ വികസനത്തിനും കപ്പൽ ഗതാഗതത്തിന് 74.7 കോടിയും അനുവദിച്ചിട്ടുണ്ട്. കൊല്ലം തുറമുഖ വികസനത്തിന് പ്രത്യേക തുക വകയിരുത്തി. ചെറുകിട തുറമുഖങ്ങൾക്ക് അഞ്ച് കോടി രൂപ വകയിരുത്തിയതായും മന്ത്രി പറഞ്ഞു.