തെരഞ്ഞെടുപ്പിൽ മോദിക്ക് ക്ഷീണം; ഓഹരി വിപണിയിൽ അദാനിക്ക് തളർച്ച

ലോക്സഭാ തെരഞ്ഞെടുപ്പ് ഫല പ്രഖ്യാപനം പുരോഗമിക്കുന്നതിനിടെ ഇന്ത്യൻ ഓഹരി വിപണിയിൽ ഓഹരികൾ കൂപ്പുകുത്തി. നരേന്ദ്ര മോദിയുടെ നേതൃത്വത്തിലെ എൻഡിഎ മുന്നണിക്ക് വ്യക്തമായ ആധിപത്യം നേടാനാകില്ലെന്ന നിലയിൽ ഫലസൂചനകൾ വന്നതോടെയായിരുന്നു ഓഹരി വിപണിയിൽ മുൻനിര കമ്പനികളുടെ ഓഹരികൾ താഴേക്ക് പോയത്. മോദിയുടെ അടുപ്പക്കാരനെന്ന വിശേഷണം ഏറ്റവും കൂടുതൽ കേട്ട ഗൗതം അദാനിക്കായിരുന്നു ഇക്കൂട്ടത്തിൽ വലിയ തിരിച്ചടിയുണ്ടായത്. അവസാനം വിപണി ഇന്നത്തേക്ക് വ്യാപാരം അവസാനിച്ചപ്പോൾ വിവിധ ഓഹരി സൂചികകളിലായി 3093 ഓഹരികൾ വിലത്തകർച്ച നേരിട്ടു. 331 ഓഹരികൾ മുന്നേറി. 55 ഓഹരികളുടെ വിലയിൽ മാറ്റമുണ്ടായില്ല.

ഏറ്റവും വലിയ തിരിച്ചടി നേരിട്ടത് അദാനി പോർട് ആൻ്റ് സെസ്, അദാനി എൻ്റർപ്രൈസസ്, ഒഎൻജിസി, എൻടിപിസി, എസ്ബിഐ തുടങ്ങിയ ഓഹരികൾക്കായിരുന്നു. 335 രൂപ ഇടിഞ്ഞ് അദാനി പോർട്സ് ഓഹരികൾ ഇന്ന് 1248.95 ലാണ് ക്ലോസ് ചെയ്തത്. അദാനി എനർജി 244.35 രൂപ കുറഞ്ഞ് 977.6 ആയി. അദാനി എൻ്റർപ്രൈസ് 704 രൂപ കുറഞ്ഞ് 2941 ലേക്കും അദാനി ഗ്രീൻ എനർജി 392 രൂപ കുറഞ്ഞ് 1646 ലേക്കും അദാനി ടോട്ടൽ ഗ്യാസ് 210.7 രൂപ കുറഞ്ഞ് 908.7 ലേക്കും താഴ്ന്നു. റിലയൻസ് ഇൻ്റസ്ട്രീസ് ഓഹരി വില 7.49% ഇടിഞ്ഞ് 2794.55 ലേക്കും താഴ്ന്നു.