പാലായിൽ മൂന്നുകിലോ കഞ്ചാവുമായി ഒഡീഷ സ്വദേശികൾ അറസ്റ്റിൽ

മൂന്നേകാൽകിലോ കഞ്ചാവുമായി നാല് ഒഡീഷ സ്വദേശികൾ പാലായിൽ അറസ്റ്റിൽ. പാലായിലെ സ്വകാര്യ പ്ലൈവുഡ് കമ്പനി ജീവനക്കാരായ ഒഡീഷ സ്വദേശികളായ ജഗൻ മാലിക് (25), ഭൂനാഥ് മാലിക് (23), ബികേഷ് മാലിക് (25), ദീപു മാലിക് (28) എന്നിവരെയാണ് ജില്ലാ പൊലീസ് മേധാവി കെ കാർത്തിക്കിൻ്റെ നേതൃത്വത്തിലുള്ള ലഹരി വിരുദ്ധ സ്ക്വാഡ് അറസ്റ്റ് ചെയ്തത്. ഇവരുടെ താമസ സ്ഥലത്ത്നിന്ന് 3.290 കിലോഗ്രാം കഞ്ചാവ് പിടിച്ചെടുത്തു.

അതിഥി തൊഴിലാളികൾക്കിടയിൽ വിതരണം ചെയ്യാൻ സംസ്ഥാനത്തിനു പുറത്തു നിന്ന് കഞ്ചാവ് എത്തിക്കുന്നതായി ലഭിച്ച രഹസ്യവിവരത്തെ തുടർന്ന് ജില്ലാ ലഹരിവിരുദ്ധ സ്ക്വാഡും പാലാ പൊലീസും ചേർന്ന് നടത്തിയ പരിശോധനയിലാണ് സംഘം പിടിയിലായത്. പാലാ എസ്എച്ച്ഒ ജോബിൻ ആന്റണി, എസ്ഐമാരായ വി എൽ ബിനു, സി വിരാജു, എ കെ അനിൽ, പ്രകാശ് ജോർജ്, എഎസ്ഐമാരായ സുഭാഷ് വാസു, ഇ എസ് സുമേഷ്, ജില്ലാ ലഹരി വിരുദ്ധ സ്ക്വാഡ് അംഗങ്ങളും ചേർന്നാണ് പ്രതികളെ പിടികൂടിയത്. ഇവർക്ക് കഞ്ചാവ് എത്തിച്ചു കൊടുക്കുന്നവരെപ്പറ്റിയുള്ള അന്വേഷണം നടത്തിവരികയാണെന്ന് പൊലിസ് പറഞ്ഞു. പ്രതികളെ പാലാ കോടതിയിൽ ഹാജരാക്കി റിമാൻഡ് ചെയ്തു.