ഡോക്ടറുടെ കൊലപാതകം; നടന്നത് ക്രൂരപീഡനം, സ്വകാര്യ ഭാഗങ്ങളില്‍നിന്ന് രക്തം വാര്‍ന്നു

ബംഗാളിലെ ഡോക്ടറെ കൊലപ്പെടുത്തിയത് ക്രൂരമായ പീഡനത്തിന് ശേഷമെന്ന് പോസ്റ്റുമോര്‍ട്ടം റിപ്പോര്‍ട്ട്. വയറിലും കഴുത്തിലും വിരലിലുകളിലും മുറിവേറ്റെന്നും സ്വകാര്യ ഭാഗങ്ങളില്‍നിന്ന് രക്തം വാര്‍ന്നെന്നുമാണ് കണ്ടെത്തല്‍. കണ്ണടപൊട്ടി രണ്ടു കണ്ണിലും ഗ്ലാസ് തറച്ചു. സ്വകാര്യ ഭാഗങ്ങളിൽ കടുത്ത ക്ഷതവും രക്തസ്രാവവും ഉണ്ടായി. മരണം പുലർച്ചെ മൂന്നിനും അഞ്ചിനും ഇടയിലെന്നും റിപ്പോർട്ട് വ്യക്തമാക്കുന്നു. വനിതാ ട്രെയിനി ഡോക്ടറെ ആര്‍ജി കാര്‍ മെഡിക്കല്‍ കോളേജിലെ സെമിനാര്‍ ഹാളില്‍ ശരീരത്തില്‍ മുറിവുകളോടെയാണ് കണ്ടെത്തിയത്.

കേസിൽ കൊൽക്കത്ത പോലീസ് സിവിൽ വോളൻ്റിയർ സഞ്ജയ് റോയിയെ ശനിയാഴ്ച കസ്റ്റഡിയിലെടുത്തു . കേസന്വേഷിക്കാൻ ഏഴംഗ പ്രത്യേക അന്വേഷണസംഘം (എസ്ഐടി) രൂപീകരിച്ച് ആറ് മണിക്കൂറിന് ശേഷമാണ് അറസ്റ്റ്. വെള്ളിയാഴ്ച രാത്രി വൈകിയാണ് എസ്ഐടി 33 കാരനായ പ്രതിയെ ചോദ്യം ചെയ്യാൻ കൊണ്ടുവന്നത്.