വെണ്യേൽ കോളനിക്കാർ ഇനിമുതൽ വാഹനങ്ങളിൽ വീടണയും

പെരുവയൽ ഗ്രാമപഞ്ചായത്തിലെ വെണ്യേൽ കോളനിക്കാർ ഇനി മുതൽ തങ്ങളുടെ വീടുകളിൽ വാഹനങ്ങളിൽ എത്തിച്ചേരും. പി.ടി.എ റഹീം എംഎൽഎയുടെ പ്രാദേശിക വികസന ഫണ്ടിൽ നിന്ന് അനുവദിച്ച 4.5 ലക്ഷം രൂപ ചെലവിലാണ് കോളനി റോഡ് കോൺക്രീറ്റ് ചെയ്ത് ഗതാഗത യോഗ്യമാക്കിയത്. കോളനിയുടെ മറുവശത്തുള്ള പ്രധാന റോഡ് എം.എൽ.എ മുഖേന അനുവദിച്ച 20 ലക്ഷം രൂപ ചെലവിൽ നവീകരിച്ചിരുന്നു. ഈ റോഡിൻ്റെ ഗുണഫലം ലഭിക്കാതെ പ്രയാസപ്പെട്ടിരുന്ന കുടുംബങ്ങളുടെ ദുരിതത്തിനാണ് ഇപ്പോൾ ഫണ്ട് അനുവദിച്ചതിലൂടെ പരിഹാരമായത്. നവീകരിച്ച കോളനി റോഡിൻ്റെ ഉദ്ഘാടനം പി.ടി.എ റഹീം എം.എൽ.എ നിർവ്വഹിച്ചു.

പെരുവയൽ ഗ്രാമപഞ്ചായത്ത് പ്രസിഡന്റ് സുബിത തോട്ടഞ്ചേരി അധ്യക്ഷത വഹിച്ചു. ഗ്രാമപഞ്ചായത്ത് മെമ്പർമാരായ പി സഹീദത്ത്, ബിജു ശിവദാസ്, വിവിധ രാഷ്ട്രീയ പാർട്ടി പ്രതിനിധികൾ തുടങ്ങിയവർ സംസാരിച്ചു. വാർഡ് മെമ്പർ സുസ്മിത വിത്താരത്ത് സ്വാഗതവും റോഡ് കമ്മിറ്റി കൺവീനർ വി ഫസലുറഹ്മാൻ നന്ദിയും പറഞ്ഞു.