ലോക പരിസ്ഥിതി ദിനം: ഐ.എച്ച്.ആർ.ഡി സംസ്ഥാനവ്യാപക പരിപാടികൾ നടത്തി

* 100-ലധികം വിദ്യാഭ്യാസ സ്ഥാപനങ്ങളിൽ ഫ്ലാഷ് മോബ്, വാക്കത്തോൺ, സെമിനാർ, റാലി, ക്വിസ്, ഫിലിം ഫെസ്റ്റിവൽ 

കാലാവസ്ഥാ വ്യതിയാനത്തിന്റെ  വെല്ലുവിളികൾ നേരിടാൻ ‘ഐ.എച്ച്.ആർ.ഡി. ഓൺ ക്ലൈമറ്റ് പോളിക്രൈസിസ്’ എന്ന വിഷയത്തിൽ പൊതുജനങ്ങളിലും വിദ്യാർത്ഥികളിലും അവബോധം വളർത്താൻ ലക്ഷ്യമിട്ട്  ലോക പരിസ്ഥിതി ദിനത്തോടനുബന്ധിച്ച് സംസ്ഥാനവ്യാപകമായി വിപുലമായ പരിപാടികൾ സംഘടിപ്പിച്ചു. സംസ്ഥാനത്തെ നൂറിലധികം വിദ്യാഭ്യാസ സ്ഥാപനങ്ങളിൽ ഫ്ലാഷ് മോബ്, വാക്കത്തോൺ, സെമിനാർ, ഹരിത സന്ദേശ റാലി, ക്വിസ്, വീഡിയോ ജനറേഷൻ, ഫിലിം ഫെസ്റ്റിവൽ തുടങ്ങിയ പരിപാടികൾ നടന്നു. കാലാവസ്ഥാ പ്രതിസന്ധികളെ മറികടക്കാൻ സമയോചിതമായ പ്രവർത്തനങ്ങളിലൂടെ സമൂഹത്തിന് ഉത്തരവാദിത്തബോധം വളർത്തുകയായിരുന്നു പരിപാടികളുടെ പ്രധാന ലക്ഷ്യം.

സംസ്ഥാനതല ഉദ്ഘാടന ചടങ്ങ് തിരുവനന്തപുരം ഐ.എച്ച്.ആർ.ഡി. മോഡൽ ഫിനിഷിങ് സ്‌കൂളിൽ നടന്നു. ഐ.എച്ച്.ആർ.ഡി. ഡയറക്ടർ ഡോ. വി.എ. അരുൺ കുമാർ ചടങ്ങിൽ സ്വാഗതം ആശംസിച്ചു. വിക്രം സാരാഭായി സ്‌പേസ് സെന്റർ ഡയറക്ടർ ഡോ. എസ്. ഉണ്ണികൃഷ്ണൻ നായരും പ്രശസ്ത കവി പ്രൊഫ. വി. മധുസൂദനൻ നായരും മുഖ്യാതിഥികളായി. പ്രകൃതിയുടെ സൗകര്യങ്ങൾ ധാരാളമായി ഉപയോഗിക്കുമ്പോഴും അതിനെ ദുരുപയോഗം ചെയ്യുന്നത് ഒഴിവാക്കണമെന്നും ശാസ്ത്രനേട്ടങ്ങൾ പ്രകൃതിക്കും സമൂഹത്തിനും ഗുണകരമാകണമെന്നും ഡോ. ഉണ്ണികൃഷ്ണൻ നായർ ഊന്നിപ്പറഞ്ഞു. പ്രകൃതി നമ്മുടെ അമ്മയാണെന്നും, ആ ബന്ധത്തിന്റെ മൂല്യം തിരിച്ചറിഞ്ഞ് പ്രകൃതിയുടെ നിയമങ്ങളെ ബഹുമാനിച്ച് ആവശ്യത്തിനു മാത്രം വിഭവങ്ങൾ ഉപയോഗിക്കണമെന്നും പ്രൊഫ. മധുസൂദനൻ നായർ ഓർമ്മിപ്പിച്ചു.

ചടങ്ങിന്റെ ഭാഗമായി ആറ്റിങ്ങൽ ഐ.എച്ച്.ആർ.ഡി. എൻജിനീയറിങ് കോളേജ് വിദ്യാർത്ഥികൾ തിരുവനന്തപുരം മോഡൽ ഫിനിഷിങ് സ്‌കൂളിൽ ഫ്ലാഷ് മോബ് അവതരിപ്പിച്ചു. മാവേലിക്കര, അയിലൂർ, കലഞ്ഞൂർ, പുത്തൻവേലിക്കര, കാന്തല്ലൂർ, അടൂർ, മഞ്ചേശ്വരം, തൊടുപുഴ, കോഴിക്കോട് തുടങ്ങിയ കേന്ദ്രങ്ങളിൽ വാക്കത്തോൺ, സെമിനാർ, പോസ്റ്റർ മേക്കിങ്, സംവാദം തുടങ്ങിയ പരിപാടികൾ നടന്നു.