എഴുത്തുകാർ പുസ്തകവില്പനക്കാരായി : അശോകൻ ചരുവിൽ

ഓരോ വർഷവും എണ്ണമറ്റ പുസ്തകങ്ങൾ പുറത്തിറങ്ങുന്നതിലും അവയുടെ വില്പനച്ചുമതല എഴുത്തുകാരിൽ നിക്ഷിപ്തമാകുന്നതിലും ആശങ്ക പങ്കുവെച്ച് അഷ്ടമൂർത്തിയും അശോകൻ ചരുവിലും. പുസ്തകമണത്തിന്റെ നൊസ്റ്റാൾജിയക്കാലം കഴിഞ്ഞെന്നും ഓഡിയോ ബുക്കുകൾ പല കാരണങ്ങളാലും സൗകര്യപ്രദമാണെന്നും ഇരുവരും അഭിപ്രായപ്പെട്ടു. ഡയലോഗ് സെഷനിൽ പെരുകുന്ന പുസ്തകങ്ങൾ, മാറുന്ന വായന എന്ന വിഷയത്തിൽ സംസാരിക്കുകയായിരുന്നു ഇരുവരും.

പണം പുസ്തകപ്രസിദ്ധീകരണത്തിനുള്ള യോഗ്യതയായി മാറുന്നത് സങ്കടകരമാണെന്ന് അശോകൻ ചരുവിൽ പറഞ്ഞു. ഓരോ വർഷവും 3500ൽപരം പുസ്തകങ്ങളാണ് കേരളത്തിൽ പ്രസിദ്ധീകരിക്കുന്നത്. പ്രസിദ്ധീകരിക്കേണ്ടതില്ലാത്ത പുസ്തകങ്ങൾ വരെ ഇറങ്ങുന്നുണ്ട്. സാഹിത്യവിമർശനം ഇല്ലാതായതിന്റെ കുറവ് എഴുത്തിന്റെ നിലവാരത്തിലുണ്ട്. പുസ്തകവില്പനയുടെ ചുമതലകൂടി എഴുത്തുകാരന്റെ ചുമലിലാണിപ്പോൾ. എഴുത്തുകാർ സ്വന്തം പ്രമോട്ടർമാരായി തെരുവിൽ നിൽക്കുകയാണ്. സമൂഹ മാധ്യമങ്ങൾ വഴിയും അല്ലാതെയും തന്റെ പുസ്തകം വാങ്ങാൻ യാചിക്കുന്ന എഴുത്ത് സമൂഹം ആശാവഹമല്ല. സമൂഹത്തെകുറിച്ചുള്ള ആവലാതി ചുമക്കേണ്ട എഴുത്തുകാർ പുസ്തകവില്പനയുടെ ആധിയിലേക്ക് ചുവടുമാറുന്നത് ഗുണപരമല്ല. സമയവും ചിന്തയും വിപണിയെ പറ്റിയാകുന്നത് എഴുത്തിനെ ബാധിക്കും. സമൂഹം എന്ന നിലയിൽ ഇതിനെതിരെ പ്രതിഷേധമുയരുകയും എഴുത്തുകാർ വില്പനക്കാരാകേണ്ട എന്ന് പറയാൻ തയ്യാറാകുകയും വേണം.

അതേസമയം പ്രസാധകരുടെ കുത്തക അവസാനിക്കുന്നു എന്ന ഗുണവും ഉണ്ട്. ഓഡിയോ ബുക്കുകളും ഇ-ബുക്കുകളും ഓൺലൈൻ വായനയും പ്രചാരത്തിലായി. വായന കണ്ണുകൾകൊണ്ട് നടത്തേണ്ട പ്രക്രിയ എന്ന ചിന്ത മാറി. പ്രായമായവർക്കും കാഴ്ചപരിമിതിയുള്ളവർക്കും വായന എന്ന അനുഭവം സാധ്യമായതിൽ സന്തോഷമുണ്ടെന്നും അശോകൻ ചരുവിൽ പറഞ്ഞു.

ഇത്രയും പുസ്തകങ്ങൾ ആവശ്യമുണ്ടോ എന്ന് സമൂഹം ചിന്തിക്കണമെന്നും പണമുള്ളതുകൊണ്ടുമാത്രം പുസ്തകങ്ങൾ ഇറങ്ങുന്നത് നല്ല പ്രവണതയല്ലെന്നും അഷ്ടമൂർത്തിയും അഭിപ്രായപ്പെട്ടു. ചില പുസ്തകങ്ങൾ ഒരാഴ്ചകൊണ്ടൊക്കെ രണ്ടാം പതിപ്പിറങ്ങുന്നുണ്ട്. ഇത് നല്ല വായനയുടെ ലക്ഷണമാണെന്ന് തോന്നുന്നില്ല. ആനന്ദിന്റെ ആൾക്കൂട്ടം എട്ടുവർഷത്തിനും ഖസാക്കിന്റെ ഇതിഹാസം മൂന്നുവർഷത്തിനും ശേഷമാണ് രണ്ടാം പതിപ്പിറങ്ങിയതെന്ന് ഓർക്കണം. 1500 എപ്പിസോഡുകളുള്ള ഇതരഭാഷാ ഓഡിയോ നോവലുകളുടെ വിവർത്തനം വരാനിരിക്കുന്നു. അതോടെ ഓഡിയോ ബുക്കുകളുടെ നിലവാരത്തിലും കാര്യമായ കുറവുവരാനിടയുണ്ട്. പുസ്തകങ്ങളുടെ മാത്രമല്ല വായനയുടെയും നിലവാരം താഴോട്ടുപോകുന്നുവെന്ന് അഷ്ടമൂർത്തി പറഞ്ഞു.